సూపర్‌స్టార్ అల్లుడికి అవమానం!

తమిళ సూపర్‌స్టార్ రజనీకాంత్ అల్లుడు, ప్రముఖ తమిళ హీరో ధనుష్‌కు తెలుగులో అంతగా గుర్తింపు లేదు. ఆ మధ్య విడుదలైన ‘రఘువరన్ బీటెక్’తో తెలుగు ప్రేక్షకులకు కాస్త దగ్గరైన ఆయన తాజాగా తెలుగులో ‘నవ మన్మథుడు’ పేరుతో ప్రేక్షకుల ముందుకు రావడానికి రెడీ అయ్యాడు. వాస్తవానికి ఈ చిత్రం నేడు (డిసెంబర్ 1) తెలుగు, తమిళ భాషల్లో ఒకేసారి విడుదల కావాల్సి వుంది. అయితే తెలుగులో ఈ చిత్రాన్ని దక్కించుకున్న నిర్మాతల అనుభవరాహిత్యం వల్ల చిత్రం నేడు విడుదల కాలేదు. తొలిసారిగా రెండు భాషల్లో విడుదలవుతున్న ధనుష్ సినిమా కావడం, దీనికి తోడు ‘రఘువరన్ బీటెక్’ చిత్రాన్ని తెరకెక్కించిన దర్శకుడు వేల్‌రాజ్ ఈ చిత్రానికి కూడా దర్శకుడు కావడంతో చిత్రంపై పాజిటివ్ ఓపినియన్స్ వుండే అవకాశం వుంది. అయితే కేవలం తెలుగు హక్కులు దక్కించుకున్న నిర్మాతల నిర్లక్ష్యం.. ఏకపక్ష నిర్ణయాల ధోరణితో ఓ క్రేజీ సినిమాకు రావాల్సిన హైప్ రాకపోగా.. అతి తక్కువ థియేటర్లలో ఓ సీ గ్రేడ్ సినిమాలా.. ఈ సినిమాను విడుదల చేయడానికి ప్రయత్నించారు. అయినా కనీసం సినిమాకు ప్రచారం లేకుండా.. థియేటర్లు లేకుండా.. రజనీకాంత్ అల్లుడు ధనుష్‌కు అవమానం జరిగేలా నవ మన్మథుడు నిర్మాతలు వ్యవహరించడం పట్ల ధనుష్ అభిమానులు ఆగ్రహంతో వున్నారట.